呢十年，好多病友同家長都問過我同一個問題：
「戒類固醇，搽咩好？」
每一次我同佢哋講嘅，都唔係邊一支護膚品、邊一種油，或者邊一套護理方法。
而係好嚴肅咁同佢哋講：
如果你決定戒類固醇，你一定要非常清楚自己而家做緊乜、亦要知道自己點解作出呢個決定。
必須要好清楚眼前發生緊嘅究竟係乜、點解會發生？
因為當你全身紅、痕、出水、甩皮、皮膚光速惡化、擴散、夜晚瞓唔到，身邊任何一句說話都可以令你懷疑自己。
「點解爛成咁都唔搽藥？」
「你有冇睇醫生呀？」
「你咁樣係咪害緊佢？」
如果連你自己都搞唔清楚究竟係濕疹發作，定係牽涉停用類固醇後出現嘅戒斷反應，
你會好容易亂、會驚、會不停問自己：係咪其實應該搽返？
所以第一樣要準備嘅，從來唔係「忍耐力」，
而係有足夠嘅理解。
你首先要認得：戒類期間，皮膚同濕疹可以好唔同
我以前照顧戒類個案時，最常見到家長第一個反應係：
「點解會突然變成咁？」「係唔係正常？」
類固醇階段嘅表徵好多時已經唔係以前一撻、一撻嘅濕疹。
而係好似地圖咁連成大片紅。
甚至紅得我以前成日形容做「好似關公咁」。
可以好痕、好灼熱。
可以不停甩皮。
可以有滲液。
本身冇乜嘢嘅位置都開始受到影響。
現時文獻亦描述 TSW 患者會反覆出現紅、灼熱、痕癢、疼痛、脫皮、龜裂等表現，
因為發炎反應令皮膚不斷加速增生，導致大量脫皮，因為腎上腺失衡而出現發冷、出汗異常情況。
「我知道會辛苦」同「乜苦都當正常」係兩回事
要有心理準備，係真。
因為如果你預期停藥之後第二日就會開始靚返，當皮膚反而變得更差，你會非常容易崩潰。
但：心理準備唔係叫你預設所有惡化都係必經過程。
出水，可以發生。
甩皮，可以發生。
紅腫，可以發生。
但同一時間，患者亦可以有細菌感染、病毒感染、接觸性皮膚炎，甚至其他需要醫療處理嘅問題。
所以你真正要建立嘅唔係：「無論見到乜都唔驚。」
而係：「我知道邊啲可以繼續護理，邊啲情況我要停低重新評估。」
照顧者嘅角色係協助患者舒服一點、少受一點額外傷害
我好希望家長或照顧者（老公、老婆、男友、女友、子女）睇住你心愛嘅人戒類時明白嘅一樣嘢。
你唔需要每日望住佢受苦，逼自己諗：
「我要做啲乜先可以令佢快啲好？」
好多時你真正能夠做嘅，只係護理：
保持皮膚基本清潔。
減少反覆摩擦。
避免太熱。
幫佢處理抓損。
選擇佢當下皮膚接受到嘅外用品。
讓佢盡量休息。
有啲時候甚至係同一件產品，用法唔同，結果都可以完全唔同。
皮膚乾到裂，同大片紅熱出水，本來就唔應該完全用同一套方法。
所以我一直都會叫大家不時影相俾我睇，唔係因為我想儲你哋啲相，
而係因為皮膚每日狀態都可以唔同。
今日適合厚厚搽，聽日未必。
今日需要加強封護，另一日皮膚可能已經熱、濕、黏到根本受唔到。
護理唔係一張固定食譜。
係一路睇，一路調整。
戒類固醇，從來不等於拒絕西醫
我從來都唔係反對西醫。
我反對嘅，只係一次又一次盲目使用類固醇去處理濕疹，而唔搵出濕疹反覆惡化嘅原因。
而選擇戒類固醇，亦從來唔代表：
「以後咩藥都唔用、咩醫生都唔睇。」
甚至完全相反：戒類固醇期間，醫療更好時係我哋嘅好幫手。
當皮膚屏障嚴重受損、長期抓損、滲液，本身就有機會再疊加其他問題。
眼前見到嘅每一次惡化，都唔可以自動用一句：「戒類係咁㗎啦。」去解釋晒。
我以前就試過收到病友或者客人同我講：「今次突然差得好嚴重。」
一開始佢以為只係戒類期間又一次 flare。
但當佢 send 相俾我睇，我見到嘅已經唔只係普通出水、紅、痕、甩皮，而係有明顯嘅細菌感染警號。
我第一時間提醒佢要去睇醫生。
因為如果真係出現細菌感染，就需要由醫生判斷係咪需要抗生素或者其他適當治療。
感染如果唔處理，係唔會因為你正在戒類固醇或者唔用藥自動消失，反而會繼續惡化甚至出現蜂窩性組織炎。
「懂得戒類固醇」其中一個重點係：
要識得分辨咩可以靠日常護理，咩已經超出護理範圍，需要醫療介入。
唔再依賴類固醇，同拒絕必要醫療，係完全兩回事。
戒類固醇唔係拒絕西醫，而係唔再盲目地將類固醇當成所有濕疹問題嘅唯一答案
戒口係助攻，唔係主因
我好鍾意用一個簡單嘅例子去解釋：
假設戒類期間，你本身已經有 7 分痕。
剩低嗰 3 分，好多時可能來自一啲可以改變、亦可以盡量避免嘅因素。
例如：
作息唔定時、太熱、出汗、環境刺激、飲食習慣，甚至係你最近去過邊度、接觸過啲乜。
而且每個人真正令皮膚惡化嘅 trigger 都可以完全唔同。
有時最簡單、最直接，甚至完全唔使錢嘅方法，唔係急住去做一大堆過敏測試。
而係：食簡單一點，生活慢一點，留意自己多一點。
例如：
你有冇留意食完某一啲食物之後，係咪每次都特別痕？
茄科？小麥？高組織胺食物？醃製食品？酒精？太辣？
又或者其實根本唔係食物。
可能係：天氣太熱？出完汗？去完公園？去過多塵嘅地方？附近有裝修或者地盤？
接觸過花草、清潔劑、香料或者其他環境刺激物？
我哋要做嘅唔係今日見到網上有人話：
「戒類唔可以食番茄。」
就開始連番茄都驚。
亦唔係見到有人話：
「小麥唔食得。」
「高組織胺唔食得。」
就一次過將成張餐單刪剩一半。
真正要做嘅其實係：
觀察。記錄。搵 pattern。
如果你懷疑某樣食物或者某個環境因素真係有關，就有系統咁暫時避開，再喺合適情況下重新引入，睇下症狀係咪真係可以重複出現。
真正有價值嘅，唔係「有人話呢樣唔食得」。
而係：你自己身體有冇一個一致、可重複嘅反應模式。
我我哋要減少嘅，係嗰啲本來可以避免嘅 3 分痕。
而唔係將戒類變成另一套愈戒愈多嘅規條。
更加唔係製造另一種對食物、對環境，甚至對生活本身嘅恐懼。
最後，「堅持」其實不是叫你死頂
而係，你要堅決知道：
自己點解作出唔用類固醇處理濕疹呢個決定。
唔會因為身邊任何人一句說話就完全失去方向。
亦唔會因為自己相信係 TSW，就將所有皮膚惡化都合理化。
你要識得護理、識得觀察、識得減少額外刺激，
亦要識得分辨幾時單靠自己已經唔夠。
戒類最辛苦嘅地方，從來都唔單止係皮膚。
係當你望住鏡入面嘅自己、望住眼前一個你最愛嘅人爛成咁，
腦入面有聲音同你講：不如搽一次類固醇，至少今晚舒服啲先啦
你仍然要有足夠清晰嘅頭腦去問：
身體而家發生緊乜事？
我而家真正需要做乜？
唔係因為驚，就乜都做。
亦唔係因為堅持，就乜都唔做。
你並不孤單，共勉之。